U planinskom selu Korita kod Bijelog Polja, na nadmorskoj visini od preko 1.200 metara, živi izuzetna žena čija životna priča svjedoči o neizmjernoj majčinskoj ljubavi. Muhruša Mekić, koja je nedavno proslavila 93. rođendan, može se pohvaliti ne samo dugim životom, već i izuzetno brojnom porodicom.
Prije 61 godinu, Muhruša je iz okoline Petnjice došla u zaseok Sušica u Koritima. U novom domu dočekalo ju je devetoro djece iz muževljevog prvog braka. Uz četvoro svoje djece koju je rodila, postala je majka trinaestoro mališana.
“Kada sam došla u domu sam zatekla devetoro djece koje je muž imao iz prethodnog braka,” priča baka Muhruša za VBP portal, dodajući da nikada nije pravila razliku među djecom. Njena požrtvovanost i ljubav urodili su plodom – sva djeca je i danas smatraju svojom majkom, redovno je posjećuju i pokazuju joj svoju zahvalnost.
Nana Muhruša s posebnim ponosom govori o svojoj velikoj porodici koja danas broji 183 potomka: 55 unučadi, 101 paraunuče i 27 čukununučadi. Ovi impresivni brojevi svjedoče o bogatstvu života posvećenog porodici.
Uprkos izazovima života na planini, poput nekadašnjeg pješačenja kilometrima do izvora vode, nana Muhruša ne žali ni za čim. Naprotiv, i danas ističe da bi uvijek izabrala život na selu umjesto gradskog života.
Danas živi sa sinom i snahom koji brinu o njoj, iako im to ne pada teško s obzirom na bakino dobro zdravlje. Kako kažu, rijetko posjećuje ljekara, piše VBP portal.